Айар куттаах Ийэлэр күрэхтэрэ
Ийэ баар — бу сиргэ
Аан дойду Аанньала!
Ананнын киниэхэ
Барыбыт махтала!
Алтынньы 18 күнүгэр Намнааҕы кииннэммит библиотечнай ситим ааҕар саалатыгар култуура үлэһиттэрэ уонна айар куттаах Нам улууһун урбаанньыттарын ортолоругар сүргэни көтөҕөр күрэх буолан ааста.
Үс хамаанда 5 түһүмэҕи аастылар. Ол курдук, Саха сирин историятыттан, биллиилээх дьонноруттан ыйытыыларга хоруйдаатылар. Көрдөөх оонньууларга күрэхтэстилэр. Намнааҕы кииннэммит библиотечнай ситим үлэһиттэрэ Надежда Алексеевна Афанасьева, Снежана Анатольевна Находкина дьүүллүүр сүбэҕэ олорон ким саамай элбэх сөптөөх хоруйу биэрбитинэн, саамай түргэнник сорудаҕы толорбутунан сыаналаатылар.
Түмүккэ: «Куба» айар куттаах урбаанньыттар хамаандалара III-с, «Клевер» А.Ф. Шестаков аатынан Улуустааҕы норуот айымньытын дьиэтин үлэһиттэрин хамаандата II-с, «Күбэйэ» Улуустааҕы библиотека үлэһиттэрин хамаандата I-кы бочуоттаах миэстэҕэ таҕыстылар.
Күрэҕи иилээн-саҕалаан тэрийэн ыытта — председатель Александра Алексеевна Парникова.
Бу курдук, көхтөөх ийэлэр, түбүктээх үлэттэн быыс булан, билиилэрин тургутунан көрдүлэр, сэргэхтик сынньаннылар. Бары кыттааччылар барҕа махталларын биллэрдилэр уонна инникитин даҕаны тэрээһиннэргэ кыттыахпыт диэн баҕа санааларын эттилэр.
