Култуура эйгэтин үлэһиттэрэ тирии мээчиги кыыраттылар
Олунньу 11 күнүгэр, Нам улууһун култууратын үлэһиттэрин идэлээх сойууһун кэмитиэтин тэрийиитинэн волейбол күрэҕэ буолан ааста. Бу күрэх киин уонна илин эҥэр оройуоннар өрөспүүбүлүкэтээҕи XIII спартакиадатыгар волейболга хамаанда сүүмэрдиир сыаллаах-соруктаах ыытылынна. Волейбол бырааһынньыктааҕы тэрээһинин Нам улууһун култуураҕа уонна духуобунай сайдыы управлениетын начальнига Семен Прокопьевич Ядрихинскай, Улуустааҕы идэлээх сойуус комитетын председателя Александра Алексеевна Парникова, волейбол күрэҕин Кылаабынай судьуйата Дьулусхан Ньургунович Алексеев арыйдылар. Партизан нэһилиэгин Д.И.Кривошапкин аатынан «Хомус» фольклор Дьиэтин «Дьүрүл» народнай ансаамбылын салайааччыта Мария Дмитриевна Аргунова ылбаҕай алгыстаах ырыатынан күрэхтэһээччилэр санааларын бөҕөргөттө.
М.К. Аммосов аатынан Хатырыктааҕы култуурнай-спортивнай элбэх хайысхалаах киин саалатыгар волейбол балаһаакката 70-ча киһини түмтэ. Уопсайа 9 хамаанда мустан сиэккэ нөҥүө тирии мээчиги кыыраттылар. Сүүмэрдэммит хамаандалар: «Үрдэл» (Нам улууһун култуураҕа уонна духуобунай сайдыыга управлениета, П.П. Ядрихинскай аатынан Олоҥхо дьиэтэ, «Эҥсиэли» редакция), А. Шестаков аатынан Улуустааҕы норуот айымньытын дьиэтэ, «Илин эҥэрдэр» (Көбөкөн, II-Хомустаах, Түбэ нэһилиэктэрин сынньалаҥ кииннэрэ), «Музееведы» (улуус түмэллэрин үлэһиттэрэ), Намнааҕы кииннэммит библиотечнай ситим, оҕо искусствотын оскуолаларын сүүмэрдэммит хамаандалара, «Үрдэл» (Аппааны, Бөтүҥ нэһилиэктэрин норуот айымньытын кииннэрэ), «Южный» (Партизан, I-Хомустаах нэһилиэктэрин норуот айымньытын кииннэрэ), Хатырык-Модут нэһилиэктэрин сынньалаҥ кииннэрэ сүүмэрдэммит хамаандата.
Культура үлэһиттэрэ спортка да дьоҕурдаахтара, интэриэстээхтэрэ көһүннэ. Олус тыҥааһыннаах, ыһыылаах-хаһыылаах оонньуулар буоллулар. Түмүк көрсүһүүлэргэ «Илин эҥэр» хамаанда музей үлэһиттэрин кыайан III-с миэстэҕэ тигистэ. «Үрдэл» хамаанда Хатырык – Модут сүүмэрдэммит хамаандатын кытта тыҥааһыннаах оонньуу түмүгүнэн II-с миэстэ буолла. Хатырык-Модут хамаандата I-кы миэстэ буолары ситистилэр.
«Култуура эйгэтин үлэһиттэрин ырыанан, хоһоонунан, кэнсиэринэн эрэ «олороллор» дии саныыр эбит буоллахтарына, спортка дьоҕурдаахтарын дьон-сэргэ көрөн сөхтө. Өрө күүрүүлээх, күүстээх оонньуулар 12 чаас устата барда. Чахчы даҕаны дэгиттэр идэлээхпитин, үлэлээхпитин бу спорт да өттүгэр көрдөрдүбүт.
Бииртэн биир көтөр кынаттаах кэриэтэ оонньооччу мээчиги күөрэтэн, охсон лүҥкүнэтэн, тиритии-хорутуу, охтон ыла-ыла ойон туран, ойуоккалаан, хас биирдии хамаанда биир соругунан мээчиги түһэрбэккэ буола сатаан кыайыыга дьулуурдарын көрдөрдүлэр. Председателбит Александра Алексеевна эппитин курдук: ким бэлэмнээх – ол кыайыы үөрүүтүнэн өрөгөйдөөтө.
Көрөөччүлэргэ, биир идэлээхтэригэр умнуллубат кэрэ оонньуулары көрдөрдүлэр. Холобур оҥостон, кэпсэлгэ сылдьар биир идэлээх спортсменнарбытынан киэн туттабыт. Аны сайын буолар өрөспүүбүлүкэтээҕи култуура үлэһиттэрин спартакиадатыгар волейболга Нам улууһун чиэһин көмүскүүргэ мэктиэ туппут чөмпүйүөннэрбитигэр күүстээх бэлэмнэниини баҕарабын», — диэн «А. Шестаков аатынан УНАДь» хамаанда оонньооччута, култуура үлэһиттэрин улуустааҕы союһун кэмитиэтин чилиэнэ Алтыына Шапошникова санаатын үллэһиннэ.
Нам улууһун култуура үлэһиттэрин волейболга оонньуутун А.Ф. Шестаков аатынан УНАДЬ тыынаах доҕуһуол куруһуогун салайааччыта Александр Александрович Дьяконов күрэхтэһээччилэри санааларын кынаттаах тылларынан бөҕөргөтөн, көрөөччүлэри сэргэхситэн комментатордаата.
Түмүккэ, «Хатырык нэһилиэгэ» МТ баһылыга Артур Егорович Ноговицын кыайыылаах чемпионнары эҕэрдэлээтэ, волейбол бырааһынньыгын Хатырык олохтоохторугар бэлэхтээбиттэригэр махтанна.
Бу курдук, хатыламмат биир күн тыҥааһыннаах күрэҕэ үөрүү, кыайыы көтөллөөх түмүктэннэ. Бары кыттааччыларга — култуурабыт үлэһиттэригэр чэгиэн доруобуйаны уонна спорду кытта өрүү бииргэ буолан, айа-тута таһаарыылаах үлэни баҕарабыт.
